البنون و تربيتهم

ممكن اكون قاسي و لكن هذه هي الحقيقة، النصح و الارشاد في التربية من اهم اسباب السعادة الزوجية. اذا عرفت كيف تربي نفسك فهذا الشي راح نتقل الى عيالك بشكل مباشر.

انا  و احلام متزوجين من ١١ سنة ما قد فكرنا نسئل احد انه يساعدنا في تربيتنا للعيال، اقصد انه يكون في نصح و ارشاد بدون ما يكون في ضرر على الطرفين الاب و الام، طبعا ما في احد يجي من نفسه و يعطيك النصح عشان ما يقول انه تجاوز حدوده او انه انت تعتقد انك ما تعرف تربي صح. هذا الشي اعتقد انه احدى الاسباب الاساسية اللي خلتنا نتاخر في البحث عن الاستشارة.

بعد ولادة بنتنا ليندا كان عندها نوع من انواع اعتقد انه نقدر نسميه القوة بالصريخ. كل شي عندها على كيفها و ماهو على كيفنا ، اصبحت تقودنا هي و لسنا نحن. تعاملها مع الناس القريبه مثل الاقارب كان فيه حساسية كبيرة، تحب على كيفها و تكره على كيفها و للاسف الكل كان يعطينا النظرة السلبية في تربيتها و انه نحن السبب في ذلك. استمرت ٣ سنوات على هذه الحالة.

كنت افكر انه المشكله في اطفالي! و لكن طلعت المشكله مننا نحن الضغوط اللي تجينا من الناس بسبب اطفالنا هي اللي اثرت علينا. طبعا عرفنا بالشي هذا بعد مرور سنتين من ولادة ليندا، بعد زيارة لقريبة لنا عندها دراية بكيفية التعامل مع الاطفال بحكم دراستها و خبرتها. فاعطتنا بداية الحبل و هي انه المشكله مننا نحن مش في اطفالنا.

الشي اللي كان مهون علينا مشكلتنا هذه انه نحن كنا مسافرين لامريكا، يعني بعيدين عن الضغوط اللي علينا من المشكلة هذه. طبعا بسبب الانتقادات القاسية اثرت علينا نحن كزوجين و اصبحت حياتنا متعبة كثير. للاسف ما عرفنا كيف نعيشها صح باقل المشاكل.

طبعا، في ناس تقول ليش ما سويتوا استشارات في امريكا! للاسف العادات و التقاليد ما راح يفهموها زينا نحن.

كثير من الناس قالت انه الطفل بس يكبر يتغير، فنحتاج للصبر. طبعا المشكلة انه اختها الكبيرة شهد ماكان عندها هذه المشاكل مثل القوة و الصراخ و غيرها اللي في كثير من الاوقات تخليك تتمنى انه ما تعرفها في ذلك الوقت.

و بعدها ولدت اختها الصغيرة ياسمين، و الفرق بينهم سنتين او اقل بكم شهر. بس ما شفنا فيها الاشياء اللي شفناها في ليندا من ولادتها. طبعا بحكم قرب العمر بينهم فياخذوا من بعضهم بشكل كبير جدا.

انا اتابع عمر حسين في الانستغرام و الفيسبوك و اليوتيوب من زمان. و شفت له كذا بوست عن النغير بس ما فهمته. تابعت النغير في الانستغرام، و بعدها بدات اشوف اليوتيوب الخاص بيهم.

طبعا متابعتي لقناة اليوتيوب الخاصة بالتغير بشكل اكبر في شهر جون يعني اول ما رجعنا من امريكا للاجازة الصيفية، شفت الفيديو هذا:

 

 

الفيديو كان غريب بالنسبة لي، شفته و قلت لاحلام ايش رايك في كلامها. اتفقنا انها هي هذه اللي ممكن تساعدنا.

على طول رحت للايميل الخاص بالنغير و سئلتهم هل في امكانية انه نتواصل مع استشاريين تربية اطفال ! طبعا ما كان في اي رد منهم. ما ادري هل الايميل كان غلط او انه ما يستخدموه او انه ممكن راح للاسبام. طبعا الايميل ارسلته بتاريخ ١٧ يوليو. لما شفت التاخير بعدها ب٣ ايام بس عرفت اوصل للاستاذة ليلى طيبة عن طريق حسابها في تويتر. تواصلت معاها و قدرنا انه نكون معاها كاستشارية لنا في التربية.

التعامل مع أ.ليلى كان سهل جدا، انسانة متفهمه و تعرف ايش تحتاج و تسمع منك و تعطيك الحلول اللي ممكن تناسبك.

الشي هذا حمسنا و خلانا ننتقل بشكل سريع للخطواط المستقبيلة في التعامل مع ليندا خاصة، و شهد و ياسمين بشكل عام. و كنا نعلم و نبلغ الناس التعليمات اللي كانت تعطينا اياها استاذة ليلى عشان الكل يعرف كيف يتعامل معاها.

ما انكر انه التعامل كان جدا سيئ مع اطفالي للاسف من طرفي ، الضغوطات اللي كانت تجينا كانت بتاثر علينا في كيفية التعامل مع اطفالنا. و لكن الحمد لله بدانا في التغير و ما زلنا في الانتقال بشكل كامل للتغير الايجابي في التعامل مع الاطفال.

مو عيب انه الواحد يروح للاستشاري التربوي لانه راح يساعده بشكل كبير في التغير حتى كزوجين الحياة بينهم تكون افضل و هذا اللي صار معانا.

مثلا: كانت تقلنا انه لازم نشوف رياض اطفال لليندا مؤقته حتى تحتك مع الناس و الاطفال. جلسنا ندور و حصلنا و سجلناها هي و اختها الصغيرة ياسمين. ايوه تغير التوقيت في البيت و صرنا نصحى قبل صلاة الفجر و نام بعد صلاة العشاء مباشرة. اصبح الاحتكاك مع الاقارب مربوط بفترة زمنية معينة فقط و هذا هو الصح.

و في احدى الاشياء اللي ساعدتنا هو التحدث مع الاطفال بصراحة و تفهمه. الطفل يفهم مو غبي. ما كنا نعرف الشي هذا و كنا نعتقده انه هبل !! و لكن و الله انه جاب فائده بعد فترة و اصبحت تفهم و تتغلب على عنادها بالتفاهم و الحوار.

كمان اصبح في وقت نحن كوالدين نقضيه معاهم جميعا محدود بفترة زمنية حتى يعرف الطفل انه في وقت لكل شي. و هذا الشي صار فيه تعاون من الجميع في التعامل مع بعض.

و بالنسبة لنا نحن كزوجين صار في وقت لنا نقضية مع بعض في هدوء بدون اصوات و هذا الشي ايجابي علينا.

طبعا هذه ماهو الا اشياء بسيطة تعلمناها من الاستاذة ليلى ، صحيح في ناس حتقول انه هذه اشياء بسيطة الكل يقدر يسويها. ممكن كلامكم صح و لكن الناس ماهي زي بعض، نحن ما اخدنا الدافع الا بعد الاستشارة و المتابعة معاها.

مرة ثانية، احب اقول انه ممكن نحن توقيتنا و ظروفنا غير، بس التاخير اللي صار في الفترة هذه و جلوسنا في جدة لمدة ٦ اشهر تقريبا في الانتظار لفيزتنا كان خير علينا. الحمد لله على هذه الفرصة اللي خلتنا نعرف اشياء كثيرة و من اهمها تعاملنا مع بناتنا.

هذه رسالتي و كلمة شكر لعمر حسين على برنامج النغير و اللي من خلالة اوصلنا للاستاذة ليلى طيبة.

شكررررا لكم جميعا.

           من الزمن البعيد 

  قبل اكثر من ٣٠ سنة كنّا نجي المكان هذا عشان نزور أخوالي و جدي و جدتي من أمي، كانت ذكريات جميلة. 
اليوم زرنا خالتي و تذكرنا الأيام الجميلة و الاثار اللي كنّا نحب نشوفها في الحارة.. 
   
   

  

  

  

 

  
 

يوم العنف العالمي 

كنت مار عند الكافتيريا في الجامعة و اذا اشوف هذه الفلاين اللي على شكل بوسترات مرسومة بشكل مُلفت للانتباه .. سرحت و قعدت اتفرج عليها … شي بسيط لرسالة كبيرة و مهمة .. شكرًا LSSU     

   

صوري في كتاب

الحمد لله.. حتى لما انتقلت الى جامعة جديدة و تخصص جديد عشان اقدر اخلص بسرعة و نكون في الخطوة المستقبلية افضل، ما زلت اتمتع بهوايتي المفضلة التصوير الفوتوغرافي.

كان في طلب من قسم اللغة الانجليزية  في جامعة LSSU انهم ينزلوا كتاب و محتاجين فنانين مثل مصورين او رسم فشاركت بصور عديدة تم اختيار صورتين منها في الكتاب.

الحمد لله هذا انجاز لي.. و ان شاء الله راح اشارك اكثر و اكثر

Mask man
تصوير صورة الرجل المقنع داخل استوديو
2 path
طريقين يؤديان الى مكان مجهول

بكاء الرجل

بكاء الرجل هو احساس، و مقدار من التفكر.. كم مرة بكيت قليل ..

الشي الوحيد اللي ما انساه في الحج.. مع الدكتور الشيخ خالد الجبير ..

هنا، تغيرت كثير و كثير في حاجات في نفسي..

اخر مره تاثرت كانت في صلاة المغرب في مسجد الشيخ نبيل الرفاعي، تذكرت استاذي هاني الرفاعي..

الاحساس هذا مهم، تحتاجه كل فتره و فتره.. كلنا نغلط و نفرط في الغلط بس الباب مفتوح للانسان انه يصلحها مع ربه.. انا احتاجها من فتره الى فتره.. تشعر بالراحة و تحس انك ارتحت خاصة لما تكون مع ربك..

 

رجوع الزمن

بصراحة لو اتمنى انه الزمن يرجع للوراء، عشان اشوف بعض الاصدقاء اللي قدتهم، و اللي ما يهمهم انت ولد مين او كم معاك فلوس.
دائما اسئل عن احدهم و هو محمد باشماخ ( ابو شامخ ) صديق تعرفت عليه في الجامعة و هو من اطيب الناس و ارجلهم، من الناس اللي تنبسط لما تجلس معاه.
و كنت اسئل عنه بعد التخرج و اليوم هاهو يحادثني عن طريق الوتس اب. و استرجعت جزء صغير من الماضي الجميل.

الله يا بو شامخ، شكرا لك على تواصلك و دامت صداقتنا للابد.. الشكر موجه لمحمد الحامد لانه هو اللي اطلق عليه ( ابو شامخ ) ..

اجتماع مع رئيس الجامعة

مرة اخرى، بعد ٩ سنوات دراسة ما بعد الثانوية، اجد نفسي للمرة الاولى بجانب رئيس الجامعة على نفس الطاولة ناكل من نفس الصحن و نتكلم بدومم اي مشاكل او مقدمات. بالعكس احترام متبادل.

رئيس الجامعة اليوم جانا في اجتماع لبعض طلاب الدوليين مع زوجتة و كمان شفنا ناس مسؤولين زي نائب رئيس الجامعة. الكل كان حبي و صريح، طلاب كثير تكلموا عن مشاكل . صحيح اني مالي فيها شي..

الكل تفاجئ، باني متزوج و عندي زقرات 🙂 بس عادي مشاكل الطلاب كانت موجهه بحكم انهم عزابيه، انا مالي فيها. كان نفسي اتكلم عن اقتراح بس ما كان في وقت لهذا الشي.. المره الجاية..

بس اللي احب اقوله انه رئيس الجامعة تشوفه في كل مكان لحالة يسلم و يضحك .. شي رهيب ..

شكرا http://lssu.edu

طال الصبر و النتيجة

(null)

هذا هو الايميل اللي وصلني قبل قليل من مجلة الجامعة، صراحة كان في توقع مش غرور و لكن إيماني بانه عندي شي جميل.
قدمت الاعمال في شهر أكتوبر ٢٠١٤ و حسّيت انه طال الانتظار و الحمدلله جاء الفرج و الفرحة الحلوة. صحيح التصوير الفوتوغرافي مش من أولوياتي حاليا لانه لازم اخلص تخصصي و بعد كذا لي الحق في اللي ابغاه، ننتظر الين ثاني أسبوع من شهر ٣ و نشوف المجلة.

الحمدلله اولا و اخيرا..